სირიაში ნებისმიერი ქიმიური იარაღის გამოყენება კაცობრიობის წინააღმდეგ დანაშაულს უთანაბრდება და ეს იარაღის გამომყენებლებისთვის სერიოზულ შედეგებს გამოიწვევს.
სამხრეთ კორეაში ჩატარებულ, ათასწლეულის განვითარების მიზნების ღონისძიებაზე გამომსვლელმა გაეროს გენერალურმა მდივანმა პან გი მუნმა აღნიშნა, რომ ნებისმიერ ადგილას, ნებისმიერი ადამიანის მიერ ქიმიური იარაღის გამოყენება საერთაშორისო კანონის დარღვევას ნიშნავს. მუნმა აღნიშნა, რომ სირიაში ქიმიური იარაღის გამოყენების შემთხვევების გამოძიება მნიშვნელოვანია: "დრო არ უნდა დავკარგოთ. კონფლიქტის მხარეებმა ომი უნდა შეწყვიტონ და მოლაპარაკებები დაიწყონ. ეს კრიზისიდან გამოსვლის ერთადერთი გზაა. ჩვენი მიზანი უცლელი რჩება: კონფლიქტის მთლიანად შეჩერება, ჰუმანიტარული დახმარების გაწევა და ხელისუფლებასა და ოპოზიციას რაც შეიძლება მალე ჟენევაში მოლაპარაკებების მაგიდასთან მოყვანა".
აღსანიშნავია, რომ ამჟამად სირიაში გაეროს ექსპერტთა ჯგუფი მუშაობს, რომელიც არკვევს, გამოიყენეს თუ არა ქიმიური იარაღი.
სირიაში კონფლიქტის დაწყებიდან დღემდე 100 ათასი ადამიანი დაიღუპა, 2 მლნ-ზე მეტი ადამიანი ლტოლვილი და იძულებით გადასახლებული გახდა.