Çətin dağlıq relyefin olmasına və havaların şaxtalı keçməsinə baxmayaraq Bakı-Tbilisi-Qars (BTQ) dəmir yolunun Gürcüstan ərazisindəki hissəsinin tikintisi başa çatdırılıb. Yolun bu hissəsində sınaq qatarı xəttə buraxılıb. Axalkalakidən yola çıxan qatar dekabrın 26-da axşam Türkiyə ilə sərhəddəki Karçaxi stansiyasına çatıb.

Bu sözləri Azərbaycan Respublikası Nəqliyyat Nazirliyinin “Azəravtoyolservis” Qapalı Səhmdar Cəmiyyətinin Gürcüstan filialının rəhbəri Qurban Piriyev deyib.

Q.Piriyev bildirib ki, tikintisinə 2007-ci ildə başlanılan yolun yardımçı hissələr də daxil olmaqla Gürcüstan ərazisindəki ümumi uzunluğu 245 kilometrdən çoxdur. Bunun yalnız 185 kilometri birbaşa istifadə üçündür və baş yol hesab olunur.

Qeyd olunub ki, yolun Axalkalakiyə qədər olan hissəsi keçmiş sovetlər dövrünün standartlarına uyğun tikilib. Buradan Türkiyə sərhədinə - Karçaxi stansiyasına qədər olan hissə isə Avropa standartlarına uyğun inşa olunub. Bu yola uyğun olaraq Almaniyadan yeni lokomotiv də alınıb.

Bildirilib ki, BTQ-nin Gürcüstan hissəsinin tikintisinə ümumilikdə 775 milyon dollar vəsait xərclənib. Bu vəsaitin də xeyli hissəsini Azərbaycan hökuməti güzəştli şərtlərlə, uzun müddətə Gürcüstana kredit kimi verib.

Hazırda yolun Türkiyə ərazisindəki hissəsində işlərin cədvəl üzrə getdiyini bildirən Q.Piriyev deyib ki, burada xəttin uzunluğu 74 kilometrdir. Artıq tunellər tikilib və əsas yolda torpaqlama işləri aparılır. İşlərin gələn ilin sonunadək başa çatdırılması nəzərdə tutulub.

Q.Piriyev deyib: “Bu layihə nəticəsində Azərbaycan Avropa ilə Asiyanı birləşdirəcək. Bu yol təkcə insanların və yüklərin daşınmasına deyil, həm də mədəniyyətlərin, sivilizasiyaların daşıyıcısı olacaq, millətlərin inteqrasiyasına, xalqların rifah halının yaxşılaşmasına xidmət edəcək”.

O, yolun tikintisi zamanı yaranmış təbii və süni problemlərdən də danışıb. Bildirib ki, dünyanın heç bir yerində dəniz səviyyəsindən 2000-2500 metr hündürlükdə, dağlarda dəmir yolu çəkilməyib. Havaların şaxtalı keçməsi də işləri bir qədər gecikdirirdi. Bəzən inşaatçılar 12 dərəcə şaxtada işləməli olublar. Lakin ən ciddi problem dəmir yolunun Gürcüstanın Cavaxetiya bölgəsində, ermənilərin yığcam yaşadıqları ərazilərdən keçən hissəsində yaranıb. Ermənilər müxtəlif üsullarla yolu bağlamağa, təxribatlar törətməyə cəhd göstəriblər. Azərbaycanın və Gürcüstanın dövlət başçılarının səyi nəticəsində bu problem həllini tapdı. Mən burada bir faktı xüsusi qeyd etmək istəyirəm: “Bu problemin həllində biz Prezident İlham Əliyevin qətiyyətinin, dəstəyinin və əzmkarlığının bir daha şahidi olduq. Məhz dövlətimizin başçısının səyi və qətiyyəti nəticəsində problem öz həllini tapdı. Buna görə, gürcü xalqı da Azərbaycan Prezidentinə minnətdardır”.

Q.Piriyev bildirib ki, BTQ-nin Gürcüstan ərazisindən keçən hissəsinin rəsmi açılışı yaxın vaxtlarda olacaq.

“Gürcüstanda qazlaşdırma fəaliyyətimiz Gürcüstanın İqtisadiyyat Nazirliyi ilə 2008-ci ildə imzalanmış investisiya müqaviləsi əsasında həyata keçirilir. Həmin müqaviləyə əsasən biz tikinti işləri görür və yeni qaz şəbəkələri yaradırıq”.

APA-nın Gürcüstan bürosunun məlumatına görə, bu barədə "SOCAR ENERJY GEORGIA GAS" şirkətinin rəhbəri Azər Məmmədov APA-ya açıqlamasında bildirib.

Onun sözlərinə görə, şirkət tərəfindən bu günədək Gürcüstanda 200 minə qədər qədər potensial abunəçi üçün qaz şəbəkəsi yaradılıb: “2013-cü ilin dekabr ayında ARDNŞ prezidenti Rövnəq Abdullayevin iştirakı ilə imzalanmış memorandum əsasında bizim öhdəliklərimiz 150 mindən 250 min potensial abunəçiyə yüksəldi. Bu layihə 2017-ci ilin sonuna kimi olan dövrü əhatə edir. Hər il biz tikilən obyektlərin siyahısını Energetika Nazirliyi ilə razılaşdırırıq, sonra tikinti planı təsdiq olunur və təsisçi tərəfdən investisiyalar ayrılır”.

A.Məmmədov gələn il investisiyadan əlavə təxminən 32 min abunəçiyə qaz çəkmək planlaşdırıldığını da bildirib: "Nəticə olaraq investisiya layihəsinin axırında Gürcüstanda 80%-dən çox qazlaşdırma həyata keçirəcəyik. Biz əsasən azərbaycanlıların kompakt yaşadığı Marneuli, Qardabani, Bolnisi və digər bölgələrə diqqət yetiririk. Soydaşlarımızın yaşadığı kəndlərdə abunəçinin evinə qaz verəndə evlərin sənədlərinin (kupçaların) dövlət reyestrindən keçmədiyinin şahidi oluruq. Bu sahədə azərbaycanlı abunəçilərin çətinlikləri mövcuddur. Bu məsələ ilə əlaqədar nazirliklə danışıqlar aparır və çətinlikləri aradan qaldırmağa çalışırıq".

Gürcüstanın baş naziri İrakli Qaribaşvili ARDNŞ prezidenti Rövnəq Abdullayevlə görüşüb.

ANS PRESS-in məlumatına görə, görüş ARDNŞ-nin 2014-cü ildə Gürcüstandakı işlərinin nəticələrinə həsr olunub.

Tərəflər görüşdə "Cənub Qaz Dəhlizi" layihəsinin reallaşdırılmasının gedişini müzakirə ediblər. Qeyd edilib ki, bu layihədə Gürcüstana əsas tranzit ölkə qismində baxılır. Layihənin reallaşdırılmasına 2014-cü ilin sentyabrında başlanılıb.

Görüşdə ARDNŞ-nin Gürcüstandakı nümayəndəliyinin rəhbəri Mahir Məmmədov və Azərbaycanın bu ölkədəki səfiri Azər Hüseyn də iştirak ediblər.

BP və Azərbaycan Respublikası Dövlət Neft Şirkəti (SOCAR) bu gün Xəzər dənizinin Azərbaycan sektorunda Abşeron yarımadasının ətrafındakı dayazsulu sahədə yerləşən potensial perspektiv strukturlarda birgə geoloji kəşfiyyat işlərinin aparılması və işlənməsi haqqında Hasilatın Pay Bölgüsü sazişi (HPBS) imzalayıb. BP-dən APA-ya verilən məlumata görə, sazişi Azərbaycan Respublikası Hökuməti adından Azərbaycan Respublikası Dövlət Neft Şirkətinin prezidenti Rövnəq Abdullayev və BP-nin Azərbaycan, Gürcüstan və Türkiyə üzrə regional prezidenti Qordon Birrell imzalayıblar. Azərbaycan Respublikası Dövlət Neft Şirkətinin prezidenti Rövnəq Abdullayev deyib: “BP ilə tərəfdaşlığımızı daha da dərinləşdirəcək bu yeni sazişin imzalanması iştirakçı tərəflər – Azərbaycan Hökuməti, SOCAR və BP üçün əlamətdar hadisədir. Bununla əməkdaşlığımızın yeni mərhələsi başlanır. Bu mərhələ bizə imkan verəcək ki, yeni imkanlar aramaqla Azərbaycanda neft və qaz hasilatına uzunmüddətli gələcək təmin etmək üçün birgə işləyək. Bu yeni imkan Azərbaycanda neft hasilatının bundan sonra da on illərlə davam etməsinə töhfə verəcək.” BP şirkətinin Azərbaycan, Gürcüstan və Türkiyə üzrə regional prezidenti Qordon Birrell deyib: “BP şirkəti SOCAR ilə birlikdə Xəzərdə geoloji kəşfiyyat işlərinin bu yeni mərhələsinə qədəm qoymaqdan qürur duyur. Bu, tərəfdaşlığımızda yeni bir dövrün başlanğıcıdır. Bu yeni tərəfdaşlıq BP-nin dünyanın digər yerlərində dayazsulu ərazilərdə məsuliyyətli şəkildə geoloji kəşfiyyat işlərinin aparılması və həmin ərazilərin işlənməsi üzrə geniş təcrübəsinə və sənayedə mövcud olan ən qabaqcıl texnologiyaların istifadəsi sahəsində səriştəsinə əsaslanır. Bizim təcrübə və texnologiyalarımızın tətbiqinə daha bir imkan yaratdığına görə Azərbaycan Hökumətinə və SOCAR-a təşəkkürümüzü bildiririk.” Sazişin əhatə sahəsi Abşeron yarımadasının cənub hissəsinə doğru Xəzər hövzəsinin hüdudları boyunca uzanır. Bu sahəyə suyun dərinliyi 40 metrədək, potensial məhsuldar layın (kollektorun) dərinliyi isə 3000-5000 metr olan ərazilər daxildir.

ABŞ rəhbərliyi Meksika körfəsinə neft axıtdığına görə Böyük Britaniyanın “British Petrolium” (BP) şirkətinə cərimə kəsməyi planlaşdırır.

AzNews.az xəbər verir ki, bu haqda məlumatı “Bloomberg” saytı yayıb.

Məlumatda deyilir ki, cərimənin 16-18 milyard dollar olacağı deyilir.

BP-nin işi ilə bağlı Yeni Orleana Federal məhkəməsi icraata başlayıb.

Məhkəmə BP-nin tərəfdaşı olan Anadarko şirkətini də 1 milyard dollar həcmində cərimələcəyi açıqlanıb.Qeyd edək ki, məlum hadisə 2010-cu ildə BP-nin “Deepwater Horizon” platformasında baş verib. Qəza zamanı 11 nəfər ölüb. 3 ay ərzində körfəzə 4.9 milyon barel neft axıb.

“Bakı-Tiflis-Qars dəmir yolu test qatarı üçün hazırdır”.

AzNews.az xəbər verir ki, bu sözləri Gürcüstanın Azərbaycandakı səfiri Teymuraz Şaraşenidze deyib.

Onun sözlərinə görə, Bakı-Tiflis-Qars dəmir yolu layihəsinin 2015-ci ildə tamamlanacağı deyilir.

Dəmir yolu Azərbaycan, Gürcüstan və Türkiyə arasında imzalanan sazişə görə inşa edilir. Layihəyə görə dəmir yolunun 105 kilometri yenidən tikilib.

Layihənin tamamlanmasından sonra bu dəmir yolu ilə ildə 17 milyon ton yük daşınacağı gözlənilir.