საქართველოს პრეზიდენტმა მიხეილ სააკაშვილმა ნატოსა და გამოძიების ფედერალურ ბიუროს სთხოვა, იმ ვიდეოების, სადაც საქართველოს ავღანეთში სამხედრო ოპერაციებში მონაწილეობის გამო ემუქრებიან, ავტორის და დამკვეთის ვინაობა გაარკვიონ.

აღნიშნულ ვიდეოებში ქართველ სამხედროებს ჯვაროსნები უწოდეს და განაცხადეს, რომ ყველა ჯვაროსანს მოკლავდნენ.

ვიდეო ინტერნეტში 6 ივნისს, ავღანეთის ჰელმენდის პროვინციაში 7 ქართველი სამხედროს სიკვდილის გამომწვევ აფეთქებამდე სამი საათით ადრე გავრცელდა.

შეგახსენებთ, რომ ტერორისტ-კამიკაძემ მინით აღჭურვილი ავტომობილი სამხედრო ბაზის ტერიტორიაზე ააფეთქა და 7 ქართველი ჯარისკაცის სიცოცხლე იმსხვერპლა.

აფეთქების შედეგად 9 ადამიანი დაშავდა.

აღსანიშნავია, რომ ამ ბაზაში ამერიკელები მსახურობენ, ქართველი ჯარისკაცებისგან შემდგარი მცირე ჯგუფს კი ბაზის დაცვა ევალება, თუმცა კამიკაძის მიზანი სწორედ ქართველი ჯარისკაცები იყვნენ.

ავღანეთში 1500-მდე ქართველი მსახურობს. ოფიციალური თბილისი 2004 წლიდან აგზავნის ჯარისკაცებს ავღანეთში. ამ ხნის განმავლობაში ავღანეთში 30-მდე ქართველი ჯარისკაცი დაიღუპა.

საქართველოს ხელისუფლებამ ვიდეოს დემოკრატიული პრინციპების წინააღმდეგ მიმართული ვიდეოკლიპი უწოდა.

საქართველოს პრეზიდენტის ადმინისტრაციის ხელმძღვანელმა ანდრეი ბარნოვმა განაცხადა, რომ დარწმუნებულია, „ეს ვიდეო საქართველოსთვის ავღანეთზე უფრო ახლოს მყოფი ძალების მიერ არის დამზადებული“.