"ფეისბუქში" რამდენიმე საათის წინ შეიქმნა გვერდი, სახელწოდებით "საზოგადოება", სადაც ინტერნეტ-მომხმარებლები ფოტოების მეშვეობით ადასტურებენ, რომ 17 მაისის მოვლენებთან დაკავშირებით პარლამენტის თავმჯდომარის დავით უსუფაშვილის სახელზე შესული ხელმოწერები ნამდვილად მათ ეკუთვნით და არ არის გაყალბებული. გვერდი სოციალურ ქსლეში 3 საათის წინ შეიქმნა, თუმცა მას უკვე ჰყავს 400-ზე მეტი ხელმომწერი.

მოქალაქეები, რომლებმაც საქართველოს პარლამენტს 17 მაისის ძალადობრივი მოვლენების ადეკვატურის შეფასების თხოვნით მიმართეს, ადამიანის უფლებათა დაცვის კომიტეტის მიერ 17 მაისის მოვლენების ცალმხრივად განხილვას აპროტესტებენ და მოუწოდებენ პარლამენტს, შეასრულოს სახალხო დამცველისა და სამოქალაქო სექტორის რეკომენდაციები.

ეკა ბესელიას განცხადებით, (პარლამენტის ადამიანის უფლებათა დაცვის კომიტეტის ხელმძღვანელი) 17 მაისის მოვლენებთან დაკავშირებით პარლამენტში შესული პეტიცია, რომელსაც 12 000 ხელმომწერი ჰყავს, ყალბია.

მოქალაქეთა განცხადებას, რომელიც ეკა ბესელიას განცხადებებთან დაკავშირებით დღეს გაავრცელეს, უცვლელად გთავაზობთ:

"2013 წლის 17 ივნისს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, ეკა ბესელიამ სხდომაზე შემაშფოთებელი განცხადებები გააკეთა. კერძოდ, მან განაცხადა, რომ "კომიტეტის დასკვნა არ სცილდება პატრიარქის მიერ გაკეთებულ შეფასებას".

საქართველოს პარლამენტარების და მით უფრო, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის ამგვარი განცხადებები საქართველოს უმაღლეს სასულიერო პირს საქართველოს კონსტიტუციასა და ადამიანის უნივერსალურ უფლებებზე მაღლა აყენებს, რითაც აშკარას ხდის თეოკრატიის რეალურ საფრთხეს ქვეყანაში. ამგვარი უპასუხისმგებლო განცხადებები ხელს უშლის საქართველოს დემოკრატიულ და სეკულარულ სახელმწიფოდ ჩამოყალიბებას.

ასევე, ნიშანდობლივია ის ფაქტი, რომ სხდომაზე არ იყვნენ მიწვეულნი არც 17 მაისს დაზარალებულნი, არც არასამთავრობო ორგანიზაციების წარმომადგენლები, რომლებიც აკვირდებოდნენ პროცესებს, არც მოქალაქეები (12 000-მდე ხელმომწერი), რომლებმაც განცხადებით მიმართეს პარლამენტს და ყველა იმ მოძალადისა და ძალადობის წამქეზებლის კანონის შესაბამისად დასჯა მოითხოვეს, ვინც არ მისცა მშვიდობიან მანიფესტანტებს თავისუფლად შეკრებისა და გამოხატვის საშუალება და დაემუქრა მათ სიცოცხლესა და ჯანმრთელობას.

წინააღმდეგ შემთხვევაში, მივიჩნევთ, რომ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე არ იცავს ადამიანის უფლებებს, არის მიკერძოებული და ვერ ასრულებს მასზე დაკისრებულ მოვალეობებს და მოვითხოვთ მის გათავისუფლებას დაკავებული თანამდებობიდან", - აღნიშნულია განცხადებაში. 

საქართველოს ენერგეტიკის მინისტრმა კახა კალაძემ და დიზაინერმა ანუკი არეშიძემ ოფიციალურად იქორწინეს. ამის შესახებ ინფორმაცია ანუკი არეშიძემ უკრაინულ ტელეარხ 1+1-ზე გადაცემა "Світське життя"-ს წამყვან კატია ოსადჩაიას დაუდასტურა.

"ხელი მოვაწერეთ, უბრალოდ ტაძარში არ ვყოფილვართ, - განაცხადა არეშიძემ და იქვე დასძინა, რომ ქორწილი გაიმართება, თუმცა ჯერჯერობით უცნობია, როდის, - ნუ ვიმკითხავებთ. ორივე ვოცნებობთ ჩვენს ქორწილზე. ორი წელია საქორწილო კაბა შინ მაქვს. კახისაც აქვს კოსტუმი. მაგრამ არ გამოდის...".

არეშიძის თქმით, მიუხედავად კაბის "ასაკისა", ის ყოველთვის მოდაში იქნება, ვინაიდან მსოფლიოში ერთადერთია". დიზაინერმა Victor&Rolf-ის საქორწილო კაბა

ამსტერდამში შეიძინა.

ანუკიმ ასევე აღნიშნა, რომ კახის მინისტრის თანამდებობაზე დანიშვნის შემდეგ მათი ცხოვრება ძალიან შეიცვალა.

"ადრე ერთი ადამიანი მიცავდა, ახლა - ორი. ადრე თავისუფლად შემეძლო რესტორნებში სადილი, ახლა კი ეს ნაკლებად მისასალმებელია. ამიტომ გამუდმებით სახლში ვარ. ვმუშაობ კოლექციებზე და მეუღლეს ველოდები", - განაცხადა დიზაინერმა.

კახა კალაძესა და ანუკი არეშიძეს ორი შვილი ჰყავთ. წყვილს ჯვარი არ აქვს დაწერილი.

17 ივნისს თავდაცვის მინისტრსა, გენერალ-პოლკოვნიკ საფარ აბიევსა და აზერბაიჯანში სამუშაო ვიზიტით მყოფ საქართველოს თავდაცვის მინისტრ ირაკლი ალასანიას შორის შეხვედრა გაიმართა.

თავდაცვის სამინისტროს პრესრელიზის ინფორმაციით, შეხვედრაზე მინისტრებმა აზერბაიჯან-საქართველოს ურთიერთობების, სამხედრო თანამშრომლობის პერსპექტივებსა და რეგიონში სამხედრო-პოლიტიკური ვითარების შესახებ აზრები გამოცვალეს.

ინციდენტი ხაჩმაზის სასაფლაოზე მოხდა.

გუშინ ხაჩმაზის სოფელ გიმილის ტერიტორიაზე მიმდებარე სასაფლაოზე ძლიერი ხანძარი მოხდა. ცეცხლმა 2.5 ჰა-ის ტერიტორია დაფარა. შემთხვევის ადგილზე სასწრაფოდ საგანგებო სიტუაციების სამინისტროს ხაჩმაზის სახელმწიფო ხანძარსაწინააღმდეგო განყოფილების სახანძრო მანქანები და ცოცხალი ძალა ჩაირთო.

ცეცხლმა საფლავები დააზიანა. ცეცხლის შედეგად მოვლუდ შერიფოვის კუთვნილი 40-მდე ვაშლის ხე დაიწვა.

საბედნიეროდ, ხანძრის დროს არავინ არ დაშავებულა.

ბაქოში თვითმკვლელობა მოხდა.

იასამალის საოლქო პროკურატურის ინფორმაციით, შემთხვევა დღეს რაიონის მეორე ალატავა 2 ნ მისამართზე მოხდა.

ამ მისამართზე მცხოვრებმა 1974 წელს დაბადებული გაიბლი ფერმან ბოიუკაღას ძე საკუთარ ბინაში თავი ჩამოიხრჩო. თვითვმკვლელობის მიზეზები ჯერჯერობით უცნობია.

ფაქტთან დაკავშირებით სამართლის საქმე აღიძრა, მიმდინარეობს გამოძიება.

სენაკის რაიონის სოფელ ზემო კოტიანეთის მოსახლეობამ დღეს გზა გადაკეტა. აქციის მონაწილეების განცხადებით, სოფლის მოსახლეობის დაახლოებით 80%-სთვის სოფლის მეურნეობის ვაუჩერები არ დაურიგებიათ. ისინი ვაუჩერების დროულად გაცემას ითხოვენ.

საპროტესტო აქციის მონაწილეებს სოფლის მეურნეობის სამინისტროს სენაკის საინფორმაციო ცენტრის ხელმძღვანელი შეხვდა. მისი განცხადებით, ხელნაწერ სიებში ამ ადამიანების მონაცემები შეყვანილი იყო, თუმცა, ელექტრონულ სიაში მათი შეყვანა არ მომხდარა და ამ შემთხვევაში აუცილებელია ცენტრალური ხელისუფლების დახმარება.