პრეზიდენტი რესტორანში შვედეთის დელეგაციის წევრებთან ერთად ვახშმობდა, როდესაც არასამთავრობო ორგანიზაციების წარმომადგენლებმა და ყოფილმა პოლიტპატიმრებმა შენობასთან ხმაურიანი აქცია გამართეს. 

„ტელეგრაფის“ ინფორმაციით, სააკაშვილთან ერთად იმყოფებოდა „ნაციონალური მოძრაობის“ საპრეზიდენტო კანდიდატი დავით ბაქრაძე. აქციის მონაწილეები პრეზიდენტს რესტორანთან ტრანსფარანტებით დახვდნენ. უფლებადამცველ გიორგი გაბედავას თქმით, სააკაშვილს საპრეზიდენტო ვადის ამოწურვამდე რამდენიმე დღე დარჩა და ამ აქციით სურდათ, მისთვის 9 წლიანი მმართველობის პერიოდში ჩადენილი დანაშაულებები კიდევ ერთხელ შეეხსენებინათ:
„პრეზიდენტს კიდევ ერთხელ შევახსენეთ საქართველოს დაკაგული ტერიტორიები და სოფლები, ასევე, დაღუპული ბიჭების სახელები, შევახსენეთ, რომ სულ მალე მას ჩადენილი დანაშაულებებისთვის პასუხის გაცემა მოუწევს. ჩვენ ამ დღეების განმავლობაში სააკაშვილს ყველგან დავხვდებით და მის მიერ ჩადენილ ყველა იმ ბოროტებას შევახსენებთ, რაც ქართველ ერს მოუტანა“ – განაცხადა „ტელეგრაფთან“ გიორგი გაბედავამ.
“ტელეგრაფის” ინფორმაციით, მიხეილ სააკაშვილმა რესტორანი უკვე დატოვა.

იმ საარჩევნო უბნებისთვის, რომლებიც ეროვნული უმცირესობების კომპაქტური ცხოვრების ადგილებში მდებარეობს, საარჩევნო ბიულეტენები მათთვის გასაგებ ენებზე დაიბეჭდება. ამის შესახებ დღეს სახალხო დამცველის ოფისში ეროვნულ უმცირესობათა საბჭოს წევრებთან შეხვედრის დაწყებამდე  ცენტრალური საარჩევნო კომისიის თავმჯდომარემ ზურაბ ხარატიშვილმა განაცხადა. მისი თქმით, დღევანდელი შეხვედრის მიზანს იმ საქმიანობისა და სამოქმედო გეგმის განსაზღვრა წარმოადგენდა, რომელიც საარჩევნო პროცესში ეროვნული უმცირესობების ინტერესების დაცვას უზრუნველყოფს. "იმ უბნებისთვის, სადაც ეროვნული უმცირესობები უმრავლესობას წარმოადგენენ, საარჩევნო ბიულეტენები მათთვის გასაგებ ენაზე დაიბეჭდება. ყველა საქმისწარმოება სახელმწიფო ენაზე განხორციელდება, თუმცა ყველა ინფორმაცია ითარგმნება, რათა იგი ეროვნული უმცირესობებისათვის ხელმისაწვდომი იყოს", - განაცხადა ხარატიშვილმა. შეგახსენებთ, რომ ადგილობრივი თვითმმართველობის არჩევნები 30 მაისს გაიმართება. ცნობისთვის, სახალხო დამცველთან არსებული ეროვნულ უმცირესობათა საბჭოს საქმიანობა გაეროს განვითარების პროგრამისა და უმცირესობათა საკითხების ევროპული ცენტრის მხარდაჭერით ხორციელდება.