ზუგდიდის რაიონის სოფელ ორსანტიაში რუსმა ოკუპანტებმა დღეს ადგილობრივი მკვიდრი თენგიზ ყურუა დააკავეს. როგორც "ინტერპრესნიუსის" კორესპონდენტი იტყობინება, თენგიზ ყურუა მეზობელთან, მურმან ალფენიძესთან ერთად მდინარე ენგურის ნაპირთან ფიჩხის შესაგროვებლად იყო წასული, როდესაც მათთან ორი რუსი ჯარისკაცი მივიდა და ცხენიანი ოთხთვალით გასეირნება მოსთხოვეს.

ყურუას თანმხლებმა პირმა გაქცევა მოახერხა. ალფენიძის განცხადებით, მათ ე.წ. სასაზღვრო პერიმეტრი არ დაურღვევიათ. ზუგდიდის რაიონის სოფელ ორსანტიასა და გალის რაიონის სოფელ ოტობაიას შორის გავლებულია ე.წ. სასაზღვრო თხრილი, თუმცა ისინი თხრილს იქით არ გადასულან. დაკავება სოფელ ორსანტიაში მოხდა.
ოჯახის წევრების განცხადებით, მათ ამ დრომდე არავინ დაკავშირებია. დაკავებული, სავარაუდოდ, გალის რაიონის სოფელ ნაბაკევშია გადაყვანილი.

სირიის ჯარის 70-ზე მეტი ოფიცერი ოჯახებთან ერთად თურქეთის ტერიტორიაზე გადმოვიდა და ქვეყანას პოლიტიკური თავშესაფარი სთხოვეს.

7 გენერალისა და 20 პოლკოვნიკის ჩათვლით 73 სირიელი ოფიცერი თურქეთის სამხრეთის ქალაქ რეიჰანში ჩავიდნენ. ოჯახის წევრებთან ერთად ლტოლვილთა რაოდენობა 202-ს შეადგენს. თითოეული მათგანი ოფიცრებისთვის სპეციალურად შექმნილ ბანაკში განათავსეს. თავდაცვის სამინისტრო და ქალაქ რეიჰანლის ხელმძღვანელობა ოფიცრების თურქეთში ჩამოსვლის თარიღს არ აცხადებენ.

ამჟამად ცნობილია, რომ თურქეთის ტერიტორიაზე შემდგარ ბანაკებში 195 ლტოლვილი სირიელი ცხოვრობს.

პირადი ცხოვრების ამსახველი მასალები ორი კვირის განმავლობაში განადგურდება, - ამის შესახებ შს სამინისტროში გამართული შეხვედრის შემდეგ ჟურნალისტებს გაზეთ "რეზონანსის" მთავარმა რედაქტორმა ლაშა ტუღუშმა განუცხადა.

მისი თქმით, დღეს აღნიშნულთან დაკავშირებით საბოლოო შეთანხმება შედგა. "მე მიმაჩნია, რომ ეს იყო ძალიან მნიშვნელოვანი შეთანხმება. ჩვენ კვლავ შევხვდებით ერთმანეთს მომავალ კვირას, რათა გავიაროთ დებულება. უნდა ვნახოთ, უფრო კონკრეტულად რა წესით მოხდება მასალების განადგურება და როგორ იქნება აღწერილი ყველაფერი, რა ტიპის მასალებია, როგორი ვადები და ა.შ. ასევე ვისაუბრეთ, თუ ვინ დაესწრება ამ პროცესს. ჩვენი წინადადება იყო, რომ პროცესს დაესწრონ ჟურნალისტები და რომ ეს მოხდეს საჯაროდ", - აღნიშნა ტუღუშმა.

მისივე თქმით, შეხვედრას ესწრებოდნენ შს მინისტრი ირაკლი ღარიბაშვილი, მთავარი პროკურორი არჩილ კბილაშვილი, "საერთაშორისო გამჭვირვალობა – საქართველოს" ხელმძღვანელი ეკა გიგაური, ექსპერტი კახი კახიშვილი და სახალხო დამცველი უჩა ნანუაშვილი.

დღეს თბილისში იმ მუსულმანების მხარდასაჭერი აქცია გაიმართა, რომლებსაც სამთაწყაროში პარასკევის ლოცვის ჩატარებას უშლიდნენ.

რელიგიის თავისუფლების სასარგებლოდ გამომსვლელთა შორის მართლმადიდებელნი, ბაპტისტები და კატოლიკები იყვნენ.

ევანგელურ-ბაპტისტური ეკლესიის ეპისკოპოსმა რუსუდან გოცირიძემ განაცხადა, რომ ხელისუფლებამ ზომები უნდა მიიღოს მუსულმანთა თავისუფალი ლოცვისთვის.

მისი თქმით, მხოლოდ პოლიციის თანამშრომლები კი არა, არამედ მაღალი თანამდებობის პირებიც უნდა იყვნენ შემთხვევის ადგილზე და მოსახლეობის შორის განმარტებები გააკეთონ.

პარლამენტმა უმაღლესი განათლების შესახებ კანონში ცვილებების პროექტი პირველი მოსმენით მიიღო.

უმრავლესობის დეპუტატების განმარტებით აღნიშნული ცვილებები უმაღლეს სასწავლებებში კვალიფიციური კადრების მოზიდვას და სასწავლებლების მეტ ავტონომიას შეუწყობს ხელს.

უმცირესობის დეპუტატები კი ცვლილებებს ეწეინააღმდეგებიან და აცხადებენ რომ აღნიშნული კანონით ხელისუფლება ქვეყანას შევარდნაძის დროში აბრუნებს.

კანონპროექტი ასევე გააკრიტიკა პრეზიდენტმა სააკაშვილმა, რომელმაც განაცხადა, რომ თუ პარლამენტი ცვლილებებს არსებული სახით მიიღებს, საქართველო დაბრუნდება 90-იან წლებში.

ამ კანონის გამო დღეს თანამდებობიდან გადადგა თსუ-ს რექტორი ალექსანდრე კვიტაშვილი. მისი განცხადებით: „ეს გადაწყვეტილება იყო ერთადერთი გზა უნივერსიტეტის ავტონომიის შენარჩუნებისთვის“.

ამავე დროს, განათლების მინისტრის მოადგილე დავით ზურაბიშვილი აცხადებს, რომ ხმაური, რომელიც "უმაღლესი განათლების შესახებ" კანონპროექტში შესატან ცვლილებებს მოჰყვა, არის აურზაური არაფრის გამო, ხოლო „ლაპარაკი იმაზე, რომ აწი პრემიერ-მინისტრი რექტორებს თავად დანიშნავს, არის აბსურდი“.

ნორმირებულ სამუშაო კვირასთან, ანაზღაურებად შვებულებებთან და ხელშეკრულების შეწყვეტასთან დაკავშირებულ მუხლებში დამსაქმებელთა ინტერესების გათვალისწინებით გარკვეული ცვლილებები ისევ შევიდა. ეს ის საკითხებია, რომლის გამოც "შრომის კოდექსში" შესატანი ცვლილებების პროექტი ბიზნესსექტორის და პარლამენტში ბიზნესიდან მისული რამდენიმე დეპუტატისთვის მიუღებელია. ჯანდაცვის კომიტეტის დღევანდელ სხდომაზე მიღწეული შეთანხმების გათვალისწინებით, დამსაქმებლის მიერ განსაზღვრული სამუშაო დროის ხანგრძლივობა კვირაში 40 საათს არ უნდა აღემატებოდეს, თუმცა ამ შემთხვევაში განსხვავებული რეჟიმი შემოდის ე.წ. სპეციფიკურ საწამოებში მომუშავეთათვის და მათთვის შრომითი პროცესი კვირაში 48 საათს არ უნდა აღემატებოდეს. ანაზღაურებადი შვებულებების ნაწილში კანონპროექტის იმ ნაწილის კორექტირება მოხდა, რომელიც მძიმე, მავნე და საშიშპირობებიან სამუშაოებზე დასაქმებულ პირებს ეხებათ. კერძოდ, მათთვის განსაზღვრული დამატებით ანაზღაურებადი შვებულების პერიოდი შემცირდა და ის ნაცვლად წელიწადში 15 დღისა, როგორც ამას პროექტის თავდაპირველი ვარიანტი ითვალისწინებდა, სულ მცირე 10 კალენდარული დღით იქნება განსაზღვრული. ცვლილებებია შრომითი ხელშეკრულების შეწყვეტისას დამსაქმებლის ვალდებულების ნაწილშიც. როგორც ცნობილია, კანონპროექტის თანახმად, შრომითი ხელშეკრულების შეწყვეტისას, დამსაქმებელი ვალდებულია არანაკლებ 30 კალენდარული დღით ადრე გააფრთხილოს დასაქმებული, წინასწარი წერილობითი შეტყობინების გაგზავნის გზით. ამასთან, დასაქმებულს უნდა მიეცეს კომპენსაცია არანაკლებ ერთი თვის შრომის ანაზღაურების ოდენობით, 30 კალენდარული დღის ვადაში. ამ შემთხვევაში კანონში კიდევ ერთი დამატებითი პუნქტი იდება, რომლის თანახმადაც, შრომითი ხელშეკრულების შეწყვეტისას, დამსაქმებელი უფლებამოსილი იქნება არა ნაკლებ 3 კალენდარული დღით ადრე გააფრთხილოს დასაქმებული წინასწარი წერილობითი შეტყობინების გაგზავნით, თუმცა ასეთ შემთხვევაში, დასაქმებულს მიეცემა კომპენსაცია არანაკლებ ორი თვის შრომის ანაზღაურების ოდენობით, შრომითი ხელშეკრულების შეწყვეტიდან 30 კალენდარული დღის ვადაში.