სამების საპატრიარქო ტაძარში ავღანეთში დაღუპული სამხედროების სულის მოსახსენიებელი პანაშვიდი მიმდინარეობს. პანაშვიდს სრულიად საქართველოსკათოლიკოს-პატრიარქი, უწმინდესი და უნეტარესი ილია II მღვდელმთავრებთან ერთად ასრულებს. ტაძარში მისვლისას პატრიარქმა დაღუპული სამხედროების ოჯახის წევრებს მიუსამძიმრა და ისინი დალოცა.

გარდაცვლილი ჯარისკაცების სულის მოსახსენიებელ პანაშვიდს საქართველოს მთავრობის წარმომადგენლები თითქმის სრული შემადგენლობით ესწრებიან. სამებაში მეუღლესთან ერთად იმყოფება პრემიერ-მინისტრი ბიძინა ივანიშვილიც. ასევე, მათ ხსოვნას მეუღლესთან ერთად პატივი მიაგო აშშ-ის ელჩმა საქართველოში რიჩარდ ნორლანდმა. მოგვიანებით სამებაში მივიდა პრეზიდენტი მიხეილ სააკაშვილიც.

სულის მოსახსენიებელი პანაშვიდის შემდეგ დაღუპულ სამხედროებს დღესვე საკუთარ სახლებში გადაასვენებენ.
გარდაცვლილები არიან: კაპრალი თეიმურაზ ორთავიძე, კაპრალი გიორგი ადამოვი, პირველი კლასის რიგითი ზურაბ გურგენაშვილი, რიგითი მიხეილ ნარინდოშვილი, რიგითი ბორის ცუგოშვილი, პირველი კლასის რიგითი ზვიად სულხანიშვილი, პირველი კლასის რიგითი გიორგი ღუჭაშვილი. თავდასხმის დროს დაიჭრა საქართველოს შეიარაღებული ძალების 9 სამხედრო მოსამსახურე.

ღმერთმა ნათელში ამყოფოს მათი სულები!