აზერბაიჯანმა, საქართველომ და თურქეთმა სამხედრო ინდუსტრიის სფეროში სამმხრივი თანამშრომლობის ფორმატი უნდა შექმნან. ამის შესახებ საქართველოს თავდაცვის მინისტრმა ირაკლი ალასანიამ "Eurasianet"-ისთვის მიცემულ ინტერვიუში განაცხადა.
მისი თქმით, საქართველო სამხედრო ინდუსტრიის სფეროში აზერბაიჯანის გამოცდილების მიღებას გეგმავს.
ალასანიამ განაცხადა: "ამ ეტაპზე თანამშრომლობა მხოლოდ ინფორმაციის გაცვლით შემოიფარგლება. თუმცა, ჩემი აზრით, ჩვენ ერთობლივ საინტერესო საკითხებზე უნდა ვიმუშავოთ. საქართველო და აზერბაიჯანი მსგავსი გამოწვევების წინაშე დგანან და ქვეყნების პრიორიტებებიც მსგავსია: ჩვენ ბაქო-თბილის-ჯეიჰანის ნავთობსადენის, არსებული სტრატეგიული პროექტების უსაფრთხოება უნდა შევინარჩუნოთ. სწორედ ამიტომ ვთვლი, რომ თავდაცვის სფეროში თანამშრომლობა საერთო რეგიონული პროექტების უსაფრთხოებისთვის დადებით შედეგს მოგვცემს".
მინისტრმა აღნიშნა, რომ საქართველო ერთობლივი პროექტების განსახორციელებლად ესტონეთისა და თურქეთის სამხედრო დაწესებულებებთან მოლაპარაკებებს ჩაატარებს: "ჩვენ ესტონელ პარტნიორებთან მჭიდრო თანამშრომლობა გვაქვს. ისრაელთან ურთიერთობების გაღრმავებას ვაპირებთ".