Azərbaycan Dövlət Neft Şirkətinin (SOCAR) Gürcüstana hədiyyə etdiyi "Belarus" markalı traktorların 5-i Marneuli rayonunda əkin işləri üçün istifadəyə verilib.

APA-nın Gürcüstan bürosunun məlumatına görə, traktorların təqdimat mərasimində çıxış edən Marneuli rayon icra başçısı Temur Abazov bildirib ki, SOCAR şirkəti traktorları iki il öncə təhvil verib: "Bu günə qədər onların istifadə forması müəyyənləşməmişdi. Marneulidə kənd təsərrüfatına dəstək proqramına əsasən, traktorlar kənd təsərrüfatı torpaq sahələrinin əkin prosesinə cəlb olunacaq və onlardan aztəminatlı ailələr yararlanacaqlar. İcra hakimiyyəti yerli büdcə hesabına texnikadan istifadə xərclərini qarşılayacaq".

Tədbirdə T. Abazov rəmzi olaraq yeni texnika ilə torpağın müəyyən hissəsini şumlayıb.

Tədbirdə digər rəsmi şəxslər də iştirak ediblər.

Qeyd edək ki, SOCAR Gürcüstana 10 ədəd traktor və kotanı ölkənin Kvemo Kartli bölgəsinin qubernatorluğu ilə əməkdaşlığa dair 4 mart 2016-cı il tarixində imzaladığı Memorandum çərçivəsində təqdim edib.