Ermənistanın müvafiq qurumları Azərbaycanın işğal altındakı Kəlbəcər rayonundakı məşhur "İstisu" bulağı ətrafında yeni müalicəvi istirahət kompleksi yaratmağı planlaşdırır.

"Dalğa TV" Modern.az-a istinadən xəbər verir ki, bu haqda erməni geoloq Akop Mkrtçyan bildirib.

Onun sözlərinə görə, "İstisu" mineral bulağı ətrafında istirahət komleksinin salınması üçün yaxşı perspektiv var və Ermənistanın müvafiq qurumları bu haqda düşünür.

Akop Mkrtçyanın sözlərinə görə, perspektivdə əcnəbi turistlərin kütləvi şəkildə bura cəlb olunması mümkündür.

İşğal altındakı Kəlbəcər rayonunun adını dəyişdirərək "Karvaçar" edən işğalçılar 1992-ci ildən bəri orada qarət və talanla məşğuldurlar. Ermənilər uzun müddətdir ərazidəki qızıl yataqlarını, mineral su və ağac ehtiyatını istismar edirlər.

Xatırladaq ki, işğal altındakı "İstisu" bulağı ətrafında 1928-ci ildə eyniadlı sanatoriya salınmışdı.

Kəlbəcər İstisu mineral ehtiyatı və "İstisu" sanatoriyası ilə dünyada tanınıb. Öz kimyəvi tərkibi və fiziki xüsusiyyətlərinə görə, bu su dünyada məşhur olan "Karlovı-Varı" bulaqlarının (Çexiya) oxşarıdır və bir çox digər xüsusiyyətlərinə görə dünyada yeganədir.

< Əvvəlki		Növbəti >