დღეს საქართველოს პრემიერ-მინისტრმა ბიძინა ივანიშვილმა ჟურნალისტებისთვის მორიგი პრესკონფერენცია ჩაატარა, სადაც მათ მიერ დასმულ შეკითხვებს უპასუხა.

პრემიერი ბიძინა ივანიშვილი აცხადებს, რომ  ხელისუფლებიდან წასვლის შემდეგ, ოპოზიციაში გადანაცვლებას არ აპირებს.

კითხვაზე თუ რას ფიქრობს იმ მოსაზრებაზე, თითქოს პოლიტიკიდან რეიტინგის შესანარჩუნებლად მიდის, რათა ხელისუფლებაში "ნაციონალური მოძრაობის" დაბრუნების შესაძლებლობის შემთხვევაში, ისევ მას დაუპირისპირდეს, პრემიერი აცხადებს, რომ კარგი ანალიტიკოსისთვის ამის საფუძველი არ არსებობს.

„ხელისუფლებიდან ოპოზიციაში არ წავალ. საერთოდ პოლიტიკაში არ წავალ. ოპოზიციაში წასვლა ნიშნავს, რომ პოლიტიკაში უნდა დავრჩე“, - განაცხადა ბიძინა ივანიშვილმა. 

პრემიერის  თქმით, ხელისუფლების წასვლის შემდეგ, სამოქალქო სექტორში გადანაცვლებას აპირებს, თუმცა პოლიტიკაში აუცილებლობის შემთხვევაში დაბრუნდება. 

პრემიერმინისტრის ბიძინა ივანიშვილის განცხადებით, პრეზიდენტობის კანდიდატს გიორგი მარგველაშვილს კონკურენტი არ ჰყავს და იგი აუცილებლად გაიმარჯვებს.

მისივე თქმით, თუ მარგველაშვილი არჩევნებში ვერ გაიმარჯვებს იგი,  პრემიერობიდან უფრო სწრაფად გადადგება.

„ასეთ შემთხვევაში მე ჩავთვლი, რომ ჩემი ვალდებულებები შესრულებულია და ყველა გზა გახსნილი მექნება  სადაც მომინდება იქ ვიცხოვრებ და რასაც მენდომება იმას გავაკეთებ. აღარ მექნება ვალდებულებები. მე ვიქნები თავისუფალი", - განაცხადა ივანიშვილმა. 

პრესკონფერენციის სრულ ვერსიას DalgaTV.ge წარმოგიდგენთ: