"თუ სიტუაციას სწორედ გავაანალიზებთ და მოვლენები ისე განვითარდება, როგორც მე მინდა, საქართველო 3-4 წელიწადში ნატოს წევრი გახდება".
ეს "Bloomberg"-ისთვის ინტერვიუში საქართველოს პრემიერ-მინისტრმა ბიძინა ივანიშვილმა განაცხადა.
პრემიერ-მინისტრმა აღნიშნა, რომ რუსეთთან ურთიერთობების ნორმალიზება საქართველოსთვის სასიცოცხლოდ მნიშვნელოვანია: "რუსეთის ფედერაციასთან ურთიერთობების ნორმალიზება საქართველოს პოლიტიკური სტაბილურობისა და ეკონომიკისთვის მნიშვნელოვანია. საქართველოს მთავრობა რუსეთთან ურთიერთობების ნორმალიზების პროცესის მნიშვნელობის გათვალისწინებით, ამ მიზნის მისაღწევად ყველაფერს გააკეთებს".
საქართველოს პრემიერმა ისიც განაცხადა, რომ ამ წლის დეკემბერში პოლიტიკიდან წასვლას აპირებს: "მე ახალ წლამდე პოლიტიკიდან წავალ და საზოგადოებრივ საქმიანობას აქტიურად გავაგრძელებ. ჩემი აზრით, ჩვენი პრობლემა მთავრობაში არაა, საზოგადოებაშია. საზოგადოება ძალიან გამოუცდელი და დაბალი დონის პოლიტიკური კულტურის მატარებელია. მე ყველაფერს გავაკეთებ, რომ მას პოლიტიკური კულტურის დონე ავუმაღლო".