საქართველოს პრეზიდენტმა ქვეყნის მუსულმანებს დაუჭირა მხარი.
სამშაბათს ბათუმში ჟურნალისტებისთვის განცხადებაში მიხეილ სააკაშვილმა განაცხადა, რომ იგი ადიგენის რაიონის სოფელ ჭალაში მინარეთის დანგრევით აღშფოთებულია.
"საქართველოში ასი ათასობით მუსულმანი, უცხოეთში კი მილიონობით ქართველი-მუსულმანი ცხოვრობს. ამიტომაც მათი რელიგიის შეურაცხყოფა არ შეიძლება. ეს დაუშვებელია და ამის ჩამდენებმა კანონის წინაშე უნდა აგონ პასუხი", - განაცხადა სააკაშვილმა.
სააკაშვილმა აგრეთვე იმ ადამიანების დაკავებაზე, რომლებიც მინარეთის დანგრევის ნებართვას არ აძლევდნენ, პროტესტი გამოთქვა.
საქართველოს რამდენიმე ქალაქში მინარეთის დანგრევასთან დაკავშირებით საპროტესტო აქციები ჩატარდა. სოფელ ჭალაში, სადაც აქცია ჩატარდა, 11 ადამიანი დააკავეს.