"2019-cu ildə biz Bakıdan başlayaraq, İtaliya və Yunanıstanda tamamlanacaq, cənubi Avropanı enerji imkanları ilə təmin edəcək vacib layihəni reallaşdıracağıq. Bu o deməkdir ki, bizim daha çox tərəfdaşımız və dostumuz olacaq".  

APA-nın yerli bürosunun məlumatına əsasən, bunu Gürcüstanın prezidenti Giorgi Marqvelaşvili Abu-Dabidə Strateji Araşdırmalar Mərkəzində ictimai mühazirə zamanı deyib. 
 

Dövlət başçısı çıxışında Gürcüstanın geosiyasi rolu, qonşu və tərəfdaş ölkələrə verdiyi imkanlar barədə danışıb: “Gürcüstan Asiya və Avropa bazarlarını, Xəzər və Qara dənizləri birləşdirən regionda yerləşir. Region bir sıra ölkələrə çoxlu imkanlar təklif edir”.
 

G. Marqvelaşvili deyib ki, Sovet İttifaqının süqutundan sonra Gürcüstanın keçmiş prezidenti Eduard Şevardnadze Azərbaycan və Türkiyə ilə sıx əməkdaşlıq qurub: "Şevardnadze Xəzər dənizinin resurslarını Qara dəniz və Türkiyə ilə birləşdirən xətt yaratdı. Bu, təxminən 25 il öncə baş verib. Bu illər ərzində biz şərq və qərb ölkələri üçün imkanlar yarada bildik. Biz bu əməkdaşlıq üçün nəqliyyat, rabitə və infrastrukturun inkişafına investisiyalar qoyacağıq. Gürcüstan qlobal layihələr üçün maraqlı və perspektivli məkanlardan birinə çevrilib”.  

Prezident qeyd edib ki, Gürcüstan kiçik ölkə olsa da, Avropa, Türkiyə, Sovet İttifaqının keçmiş respublikaları və Çinlə azad ticarəti var: "Gürcüstan əsas və qlobal iqtisadiyyatlar üçün qapılar açır".