"რუსეთი საქართველოს ტერიტორიების ანექსიის და ჩვენი ქვეყნის დასუსტების პოლიტიკას აგრძელებს".
ეს საქართველოს პრეზიდენტმა მიხეილ სააკაშვილმა გაეროს გენერალური ასამბლეის სესიაზე გამოსვლისას განაცხადა. მან აგრეთვე აღნიშნა, რომ უკრაინის პრეზიდენტი ვიქტორ იანუკოვიჩიც უკმაყოფილოა რუსეთის ზეწოლით.
სააკაშვილმა განაცხადა, რომ ყოფილი საბჭოთა კავშირის რესპუბლიკების - საქართველოს, უკრაინის, მოლდოვას, აზერბაიჯანის და სომხეთის ძლიერ სახელმწიფოებად ჩამოყალიბება რუსეთს არ აწყობს: "თქვენ ფიქრობთ, რომ პუტინს აზერბაიჯანთან კონფლიქტში სომხეთის გამარჯვება სურს? არა. ეს სომხეთს ძალიან ძლიერ და დამოუკიდებელ ქვეყნად აქცევდა. თუ პირიქით, ფიქრობთ, რომ მოსკოვს სურს, რომ ბაქომ ერევანზე გამარჯვება მოახდინოს? არა. მათ საერთოდ არავის გამარჯვება არ სურთ. კონფლიქტი მათი მიზანია, რადგან კონფლიქტი ერების დამოუკიდებლობასა და ევროკავშირში ინტეგრაციას აჭიანურებს".