Gürcüstanda seçkilər zamanı silahlı insident qeydə alınıb

İstifadəçilərin qiymətləndirməsi: / 0
ZəifƏla 

alt

Gürcüstan Daxili İşlər Nazirliyi prezident seçkilərinin ikinci turu üzrə səsvermə zamanı baş vermiş 11 qanun pozuntusu faktı ilə bağlı araşdırma aparır. Araşdırmalardan biri silahlı insidentlə bağlıdır.

Bu barədə Gürcüstan daxili işlər nazirinin müavini Natia Mezvrişvili bu gün keçirdiyi brifinqdə məlumat verib. 

“Rustavi 2” televiziya kanalının məlumatına görə, Kaxeti bölgəsində Qurcaani rayonunun Çumlaki kəndində silahlı insident baş verib. Sabiq Prezident Mixeil Saakaşvilinin qardaşı David Saakaşvili 19 saylı seçki məntəqəsinə yaxınlaşarkən naməlum şəxslər ona avtomobildən atəş açıblar. Faktla bağlı araşdırma aparılır. “Şahidlərlə aparılmış söhbətdən sonra məlum olub ki, baş vermiş hadisənin seçkilərlə heç bir əlaqəsi yoxdur”, – deyə nazir müavini vurğulayıb.

Natia Mezvrişvilinin sözlərinə görə, faktlar jurnalistə qarşı fiziki təhqirə yol verilməsi, bəzi seçki məntəqələrində fiziki qarşıdurma, eyni şəxsin təkrar səs verməsi, bir seçki məntəqəsində oğurluq və digər hallarla bağlıdır. Qanun pozuntularına yol vermiş şəxslər arasında həm hakim, həm də müxalif partiyaların nümayəndələri var.